طارط رولي + طارط بالفلان والكريمة

يومكم سعيد وعواشر مبروكة لله يتقبل طعاتكم ويجعلنا وإياكم إن شاء لله العام الجاي نكونو فهاد العواشر في بيت لله الحرام قولو أمين ....

هاد الطورطات كنت نزلتهم حصريا في برنامج نجوم تتلألأ في مطابخ أناقة مغربية

كنتمنى ينالو إعجابكم وتجربوهم إن شاء لله

المقاديرالفلان للطارطة الأولى : نص لتر حليب + 4 بيضات + 2 م ك سكر

الجينواز أنا عملت زوج وحدة طيبتها مع فلان والتانية بوحدها

4 بيضات + 130 غرام سكر + 170 غرام طحين ممتاز + 2 م ص خميرة الحلوى + 1 م ص عسل

كنطرب البيض والسكر والعسل ونضيف الطحين ولخميرة كتجي لعجينة شوية تقيلة ماشي بحال اي جينواز

هنا عملت فلان كنعمل لحليب والبيض والسكر فالخلاط ونخلطهم مزيان

كبيت فلان فالمول 

 ومن لفوق الخليط د الجينواز لي عملت كبيتو بطريقة عشوائية وعملته يطيب في حمام مريم كنشوفو بموس واش طاب

 هذي الجينواز الثانية منين خرجتها من الفران

 نزلتها على فويطة فازكة وعوطتها من الجناب

لويتها وخليتها تبرد مزيان 

 وبديت كنحضر الكريمة (كنعتذر على بعض الصور موضحينش مزيان )

مقادير الكريمة : تقريبا 400 غرام بيض + نفس الوزن سكر + 30 غرام نشا + 180 غرام ماء + 1 فلان بنكهة الكراميل

خلطت السكر مع النشا

 والبيض مع الماء وكنطربو شوية ونصفيه باش يحيدو الشوائب ديال ابيض البيض لي كيبقاو وميطبوش ويخسرو الكريمة

 خلطت البيض و السكر والنشا وعملتهم فوق عافية مهيلة وهنا خص شوية د الخطر ونرد البال باش ميعمليش كويرات ومع ذالك كنصفيه باش نحصل على افضل نتيجة

 قبل ما نبدا فتحضير الكريمة عملت مول د الزجاج فالفريجو يبرد مزيان باش نبرد فيه الكريمة ومتتكتلش

 منين بردت شوية زدت عليها 1 فلان بنكهة الكراميل

 وهاهي واجدة للإستعمال

 سقيت الجينواز بسيرو حضرتو ب 1 فلان كراميل + م ك سكر + كاس صغير ماء سخون مزيان وبلا مغليتو غير خلطتو مزيان وسقيت بيه

عملت طبقة من الكريم

 وطبقة من الكريم فريش وروليت الجينواز مرة أخرى وزينتها كيف واضح فالصور

 بالطبع التزيين كيبقى حسب ذوق كل واحد

 وهادي لي كان فيه فلان عقلتو عليها هههههههههه قسمتها على زوج بشكل مستطيل

وسقيتها بنفس السيرو وزدت م ك من الكاكاو للكريم فريش وعملتو بين الطبقتين وعملت طبقة رقيقة شوية من الكريمة على الوجه وزينتها كيف واضح

 شكل طارطة د فلان من داخل

 والرولي حتى هي من داخل

أعتذر عن صور بعض المراحل مقدرتش نصورهم ولكن أي إستفسار إن شاء لله أنا في الخدمة
كنتمنى تنال إعجابكن وتجربوها إن شاء لله راها كتجي أكثر من رائعة وخصوصا ادا وجدناها فالليل وحتى لغدا عاد تتكال