tarta de princesas

 
أسعد لله أوقاتكن بكل خير

أتمنى تكونو بصحة وعافية

طارطة ليوم سهلة وبسيطة والنتيجة كتخلي لي يشوفها يقول من الباتسري رغم انها صنع منزلي

 نبداو على بركة لله ويارب تعجبكم وتكون إضافة جديدة ومفيدة لوصفاتكم

مقادير الاجنواز : 6 بيضات + 180 غ سكر + 180 غ دقيق مغربل + 1 فاني ( أنا عملت 2 جينواز بيضا و 1 بالكاكاو )

الجينواز لي فيها الكاكاو نفس المقاديرإلا الفاني و كنحيد 40 غ من الدقيق ونعوضو بالكاكاو ( شكلاط غبرة مسوس )

سيرو لسقي الكيك ( أنا سقيت بسيرو الخوخ المعلب ) ممكن تعملي أي سيرو كتفضليه

خوخ معلب مقطع مكعبات صغيرة

كريم فريش

باسطا أو ورق التزيين كل واحد شنو كيسميها

شوية نباج مخفف بشوية د الما غير شوية ماشي بزاف

شوية ملون أحمر

عقيق فضي وغوز

الطريقة المعتادة للجينواز : نطرب البيض يكون في حرارة المطبخ نطربو مزيان مع السكر والفاني حتى يتضاعف حجمهم 3 مرات ويبياض لونو

 كنضيف الدقيق مغربل شوية بشوية ونخلط بملعقة خشبية من لتحت لفوق باش نحافض على الهوا لي فالبيض

 نغلف المول أو الصينية لي غادي نطيب فيها بالسولفيريزي ونطيبها على حرارة 180° وعيني ميزاني حسب كل فرن والوقت لي كياخد

ها الجينواز طايبة 

كنقلبها فوق سولفيريزي آخر ونحيد ليها لي طابت فيه ونخليها تبرد مزيان

 هادي الجينواز بالفاني

 دابا غادي نجيو للمونطاج عملت جينواز الفاني وسقيتها مزيان بالسيرو وعملت عليها طبقة كثيفة من الكريمة وطريفات د الخوخ

ونزلت عليها جينواز الكاكاو وكررت نفس العملية 

 الطبقة الأخيرة سقيتها مزيان بالسيرو 

 
نزلت عليها صينية وضغطت غير بشوية علاش ؟

باش نقاد الكيك من لفوق ومنين نزل الصورة متجيش جهة عالية على أخرى

 غلفت بالكريمة مزيان من لفوق والجوانب عملت غير طبقة رقيقة

 كنقلب الباسطا على ضهرها وندهنها بالنباج مخفف بشوية د الما مزيان

 نزلها على الطارطة ونحاول نعملها فالوسط

نعاود ندهنها مزيـــــان بالنباج
 

دورت عليها بالكريمة بيضا وبعدا بالكريمة غوز الباقي الصور تشرحو أكثر

 هاهي واجدة بالصحة والراحة

ملاحظة : هادي طارطة تقريبا ديال 4 كيلو

كنتمنى تنال إعجابكم